ဆရာခိုင်မြတ်ကျော်
ကျွန်တော် ရခိုင်ပိုင်ရွီးစွာကို ခွင့်လွှတ်ပါ။
လူတိုင်းနားလည်စီချင်ရေ စေတနာနန့်ပါ။
စလုံးယေစ မြန်မာပြည်ကိုအုပ်ချုပ်နီရေ ဖက်ခွက်အစိုးရက တနိုင်ငံလုံးကို ဗမာဖြစ်အောင်
စီမံကိန်းချလုပ်ဆောင်နီစွာကို စပြောပါမည်။
ကျွန်တော်ရွီးရေနိဒါန်းကို လူမျိုးရေးသွီးခွဲ ပြည်ထောင်စုပြိုကွဲအောင်လုပ်တေလို့ယူဆက ဆရာရို့နရဉ္ဇရာမြန်မာသတင်းမှာ မဖော်ပြဘဲထားလို့ရပါရေ။
ယေကလေ့ စာကိုတော့ ဆုံးအောင်ဖတ်စီချင်ပါရေ။
ကျွန်တော်က ရခိုင်သားဖြစ်လို့ ရခိုင်ပြည်အကြောင်းရာ သိပါရေ။
တခြားပြည်နယ်တိမှာလည်း ကျွန်တော်ရို ရခိုင်ပြည်မှာအတိုင်း ဟိလီဖိုလိုထင်ပါရေ။
ကျွန်တော်အလယ်တန်းကျောင်းသားဘဝမှာ ကျွန်တော်ရို့နယ်ကို ဖက်ခွက်တပ်တိ ရောက်လာပါရေ။ (ခ.မ.ရ၊ ခ.လ.ရ၊ C. O. D၊ တ. ဗ. ဟ၊ ပ. ည. ရ ) ဖက်ခွက်တပ်တိမှာ လက်နက်နန့် လူပဲပါရေ။ မြီမပါပါ။
ဖက်ခွက်တပ်ထိုင်ဖို့ ရခိုင်သားပိုင်လယ်တိကို အားလုံးသိမ်းပါရေ၊ တချို့ရွာတိဆို ဖက်ခွက်တပ်နန့် နီးရေဆိုဗျာ ပြောင်းခိုင်းပါရေ။
ဖက်ခွက်တိမလာခင် ကျွန်တော်ရို့နယ်စွာ ကောင်းကောင်းအီးချမ်းပါရေ။
လုံခြုံရေးအတွက် ရဲစခန်းတခုဆို လုံလောက်ပါရေ။
ယင်းကို ဖက်ခွတ်တပ် (၅) ခု ချထားပါရေ။
သူရို့ ဖက်ခွက်တပ်က လယ်သိမ်းယူလားလို့ ရခိုင်သားမှာ လုပ်စားစရာမဟိ မွဲပါရေ။ ယေဇု ဝမ်းရေးအဆင် ပြေဖို့ နီရာသစ်သို့ပြောင်းကတ်ရပါရေ။
နီရာသစ်ပြောင်းရေဆိုစွာ ရခိုင်ပြည်တွင်း ပြောင်းစွာမဟုတ်ပါ။
ရခိုင်ပြည်က ဗမာပြည်ကို ပြောင်းလားခရစွာကို ပြောစွာပါ။
အေချင့်လည်း လူမျိုးဖျောက်တေနည်းတမျိုးပါ။
(၂) ပြောင်းလာရေ ဖက်ခွက်ဗိုလ်မယားတိက ကျောင်းဆရာမများပါရေ။
ကျောင်းဆရာမဆို အချေတိကို စာသင်ပါရေ။
ယင်းချင့်က ကောင်းပါရေ။
ပြဿနာက ဘာသာစကားပါ။
စာသင်ရေခါ ဗမာစကားပြောခိုင်းပါရေ။
ဗမာစကားပြောလို့မပီကေ အသတ်ခံရပါရေ။
ဗမာဆရာမတယောက် နာမည်က (ခင်နွဲ့မူ) ပါ။ သူ့အတန်းပိုင်ဆရာမလုပ်ခါ ကျောင်းသားနာမည်ခေါ်ပါရေ။
ကျွန်တော်ရို့ ရခိုင်သားထုံးစိုင် (ရောက်ပါရေ) လို့ထူးပါရေ။
ယင်းကို ယင်းဆရာမက ယောက်ကျားချေဆို (ရှိပါတယ် ခင့်ည) မိမ္မချေဆို (ရှိပါတယ် ခင်ရှင့်) ထူးပါရေ။ ယေခါ တတန်းလုံး ဝိုင်းရယ်ကတ်ပါရေ။
ဆရာမ ကောင်းကောင်းမာန်ပါပါရေ။
(ဗမာစကားကို ဘာထင်သလဲ) ဆိုဗျာ ကြိမ်တုတ်နန့်သတ်ပါရေ။ ပြီးကေ တတန်းလုံးကိုပြောပါရေ။
(မင်းတို့ (၁၀) တန်းအောင်ဘွဲ့ရပညာတတ်ရင်လည်း ဗမာစကားမတတ်ရင် အလကားဘဲ) လို့ပြောပါရေ။ ဗမာစကားရာ အခရာဆိုရေသဘောပါ။
အေချင့်လည်း ရခိုင်အချေတိကို ဗမာစကားပြောအောင် လုပ်ပျာ လူမျိုးဖျောက်တေနည်းတမျိုးပါ။
(၃) ဖင်ခွက်တပ်တိရောက်လာလို့ လုပ်နိုင်ကိုင်နိုင်ရခိုင်သားတိ အလုပ်မဟိ ဗမာပြည်သို့ထွက်လား၊
ကျန်အချေတိက ဗမာစကားပြောနီပါယာ။
မိမ္မတရွီကျန်ပါရေ။ ဖက်ခွက်တပ်မှာ
အိမ်ထောင်ကျဟိရေပိုင် လူပျိုလူလွတ်ဖက်ခွက်တိလည်း အများကြီးပါ။
ဇာလူမျိုးပင်ဖြစ်ဖြစ် ဖက်ခွက်တပ်ထဲဝင်ကေ ဗမာစကားပြောရပါရေ။
တတ်ကဖက်ခွက်နန့် ရခိုင်သမရကတ်စွာရွီလို့မကျပါ။
ရခိုင်သမတိဗမာစကားပြောလို့ အားလုံးဗမာဖြစ်လားပါယာ။
တချု့ရခိုင်သားတိ ဗမာကိုအထင်ကြီးလာပါရေ။
အထင်ကြီးအောင်လည်း လုပ်ထားပါရေ၊ တခါက ကျွန်တော်ရို့သူငယ်ချင်းတစု သင်္ကြန်ချဖို့ ဗမာပြည်နန့်နီးရေ နယ်စပ်မြို့ကို လားခီပါရေ။
ယင်းမှာ ရခိုင်ရိုးရာသင်္ကြန်ပွဲ ကကောင်းပျော်ဖို့ ကောင်းပါရေ။
ကျွန်တော်ရို့ တည်းနီရေအ်ိမ်နန့် ကပ်လျှက် အိမ်တဆောင်က ကျွန်တော်ရို့ကို မုန့်လုံးရီပေါ်ခေါ်ကျွေးပါရေ။ မုန့်လုံးရီပေါ်စားယင်း သူရို့ကလည်း သူရို့မြို့အကြောင်းပြော။
ကျွန်တော်ရို့ ကလည်း ကျွန်တော်ရို့မြို့အကြောင်းပြော စကားလက်ဆုံကျပါရေ။
ယင်းစကားဝိုင်းမှာ မြို့ခံတယောက်က (ငါရို့မြို့ ရခိုင်ပြည်ထဲမှာရှိစွာမကောင်း၊ ဗမာပြည်ထဲက မြို့တိဆိုကေ ကောင်းဖို့) ပြောပါရေ၊ ကျွန်တော်က သူ့ကို (ဇာဖြစ်လို့လဲ) မီးရေခါ သူက (ဗမာပြည်ထဲက မြို့တိဆိုကေ လျှပ်စစ်မီးရရေ။
လမ်းပန်းဆက်သွယ်ရေးကောင်းရေ။
စစ်တပ်က အနိုင်မကျင့်။
စီးပွားရေး ရခိုင်ပြည်ထက် အဆင်ပြေရေ) စသည်ဖြင့် ထောက်ပြပါရေ။
ဟုတ်လည်းဟုတ်ပါရေ။ အားကျဖို့ဆိုကေ အားကျလောက်ပါရေ။
ယေကေလဲ့ ရခိုင်ပြည်ထဲကမြို့ကို ဗမာပြည်ထဲပါအောင်ထည့်ချင်ရေ “စိတ်ဓါတ်” ရခိုင်သားတိ ဇာလောက်များနီဗျာလဲလို့တွေးယင်း သင်္ကြန်မှာပျော်စွာ အားလုံးပျောက်လားပါရေ။
လူဆိုစွာ အကောင်းကို နှစ်သက်ပါရေ။ ယင်းပိုင် ဗမာပြည်ကမြို့တိနန့် ရခိုင်ပြည်ကမြို့တိ ခြားအောင်လုပ်ထားစွာက ဗမာပြည်နန့်ဗမာလူမျိုးကို အထင်ကြီးအောင်လုပ်ဗျာ ရခိုင်လူမျိုးပျော်အောင် မြူဆွယ်ဖြားယောင်းနည်းတမျိုးပါ။
(၄) ဖက်ခွက်အစိုးရစွာ အခုလယ်သမားတိဘားက တင်းစပါးမဝယ်ပါယာ။
သာမန်ကြည့်ကေ ကောင်းပါရေ။ လယ်သမားတိ အခွင့်အရေးရရေ။
ကိုယ်လယ်မြေကထွက်တေစပါးဆန်ကို ကာလပေါက်ဈီးနန့်ရောင်းလို့ရပါရေ။
စီးပွားရေးအဆင်ပြေရေ။
ယေကေလဲ့ ယင်းအခွင့်ကို ရခိုင်လယ်သမားတိ မခံစားရပါ။
ဇာကြောင့်လ။ဲ
အထက်မှာ ပြောခရေပိုင် ဖက်ခွက်တပ်လာကေ လူနန့်လက်နက်ရာပါရေ။
မြီကို ရခိုင်သားဘားက သိမ်းရေ။
နည်းနည်းနောနောမဟုတ်ပါ။
ဖက်ခွက်တပ်တတပ်သိမ်းထားရေလယ်စွာ တပ်ရင်းတရင်း တနှစ်ဝမ်းစာပိုပါရေ။
ရခိုင်ပြည်မှာ စစ်တပ်ပေါင်း ဇာလောက်ဟိရေလဲ။
ရခိုင်သားပိုင်လယ်တိ ဇာလောက်ဆုံးလားခဗျာလဲ။
ကောင်းကောင်းအများကြီးပါ။
ဗမာပြည်ဘက်မှာ ဖက်ခွက်တပ်က လယ်သိမ်းရေလို့ မကြားဖူးပါ။
၊ဗမာပြည်က လယ်သမားတိ နွီစပါးစိုက်နိုင်အောင် တာတမံရီလှောင်ကန် ဆည်တိဆောက်ပီးထားစွာ အများကြီးပါ။
ရခိုင်လယ်သမားတိကိုလည်း ဖက်ခွက်တပ်က အားဓမ္မနွီစပါးစိုက်ခိုင်းပါရေ။
ဗမာပြည်မှာပိုင် တာတမံ ရီလှောင်ကန်မဟိဘဲ ဇာပိုင်စိုက်ဖို့လဲပြောခါ (၁၀) ပေပတ်လည် ကန်တိတူးခိုင်းပါရေ။
ကန်ရီနန့်စိုက်ခိုင်းပါရေ။
စိုက်မအောင်ရေအပြင် မျိုးစပါးတိအားလုံးဆုံးပါရေ။
ယင်းပိုင် စီးပွားရေးကျပ်တေကြား လုပ်အားပီးခိုင်း၊ ကြက်ဆူပင်စိုက်ခိုင်း ကြာလာကေ ရခိုင်ပြည်မှာနီရစွာညီးဗျာ ဗမာပြည်ကိုပြောင်းလားခရေ ရခိုင်သားတိ အလှိုင်းလှိုင်း အလှိုင်းလှိုင်းပါ။
အေစွာလည်း သူရို့နယ်ချဲ့ ဝါဒအောင်မြင်ရေး ရခိုင်လူမျိုးဖျောက်ရေး နည်းတမျိုးပါ။
(၅) ဆရာခိုင်မြတ်ကျော် ရခိုင်ပြည်မှာတိုးစွာဆိုလို့ ဖက်ခွက် (နတလ) ရွာရာ ဟိပါရေ။
နတလ ရွာဆိုစွာ ဖက်ခွက်တပ်က ခြီပြတ် လက်ပြတ် အကျိုးအကန်း၊ ဗမာပြည်ထဲက အိုးမဲ့အိမ်မဲ့တိကို စုတည်ထားရေ ဗမာရွာတိပါ။
အေရွာတိစွာ ရခိုင်ပြည်ကို ဗမာပြည်ဖြစ်အောင်လုပ်ဖို့ အကြံနန့်ပါ။
ယင်းပိုင် ရခိုင်ပြည်က ရခိုင်သားကိုနှင်ထုတ်၊ ရခိုင်သမကို ဖက်ခွက်နန့်ရအောင်လုပ်၊
ရခိုင်သားအချေတိကို ဖက်ခွက်စကားသင် မကြာခင် ရခိုင်လူမျိုး ပျူပိုင်ယှောင်ပျောက်ဖို့ရင်လီးဖို့ကောင်းပါရေ။
ကျွန်တော် စစ်တွေနယ်ဖက်က ကျောင်းသားတယောက်ပါ။
နိစွဲရက်မှတ်။ ။ စက်တင်္ဘာ (၂၂) ရက်၊ ၂၀၀၈ ခုနှစ်
No comments:
Post a Comment